Млади гостиварки преку поезија го кренаа гласот против родовата нееднаквост и стереотипите

Да се почитуваат жените, да им се пружат еднакви можност и услови, да престанат дискриминациите на родова основа, да нема стереотипи… Ова се дел од пораките кои ги испратија група средношколки преку поетски перформанс на настан што се одржа во Гостивар вчеравечер, под мотото „Поезија во акција“. Младите гостиварки решија преку Слем поезија да го кренат својот глас против нееднаквост и неправди врз припадничките на женскиот пол.

„Се чувствувам многу горда на себе и на сите учеснички кои се претставија и ги искажаа своите ставови креативно, во врска со нашата тема. Сфатив дека да се организира ваков настан би било нешто интересно во нашиот град, а ја одбрав темата на нееднаквост и неправда како начин да се направи некоја промена во начинот на размислување во колината. Не секогаш треба да чекаме нешто да се случи некој да направи нешто, туку и самите ние може да преземеме чекор кон позитивна промена. Им ја претставив идејата на други млади луѓе за кои сметав дека имаат желба и потенцијал да се вклучат и се подготвени да дадат свој труд. Со овој настан создадовме еден наш мал простор со шанса на младите креативни и талентирани луѓе да се искажат“, рече Симона Филипоска, организаторка на Слем вечерта, која и самата имаше настап со свој текст.

Покрај неа пред публиката се претставија: Нада Спасеска, Ева Дејаноска, Михаела Антеска, Румена Аврамоска, Марија Палазова и Искра Дукоска, ученички од гимназијата и техничкото училиште. Во музичкиот дел настапија Теодора и Росица Матески.

Настанот се организираше по повод 8 Март, Меѓународниот ден на жената.