Модна ревија и изложба на еколошки проекти на ученици во Гостивар

Оригинални модни креации и најразлични проекти од рециклирачки материјали беа претставени денес на настан што се одржа во спортската сала на техничкото училиште во Гостивар, во склоп на одбележувањето на Денот на пролетта и екологијата, 21 Март. Учениците од гостиварските училишта поддржани од своите професори ментори, уште еднаш покажаа дека имаат креативни идеи, градат еколошка свест и ги почитуваат еколошките вредности.

На модната ревија можеа да се видат уникатни фустани и друга облека изработени од хартија, пластика и слични обновливи материјали, со што младите гостиварци испратија порака за поголема грижа за зачувување на планетата Земја и животната средина. Проектите пак со исто таква симболика беа изложени на посебни штандови.

Активности за 21 Март се одржаа и низ останатите училишта во Гостивар, меѓу кои и во гимназијата, каде беше презентиран документарен филм за заштита на животната средина и штетите од аерозагадувањето, подготвен од учениците и наставниците од ова училиште. Целта на одбележувањето на овој ден со активности има за цел да ја подигне свеста на граѓаните од сите возрасни групи со цел заштита на животната средина и природата како и подигање на нивото на одржување на чистотата, наведоа од општината.