Москва мета на масовен напад со дронови, затворени аеродромите

Најмалку 19 беспилотни летала биле соборени од руската воздушна одбрана додека се приближувале кон Москва, изјави градоначалникот Сергеј Собјанин во раните утрински часови.

Според руското Министерство за одбрана, вкупно 105 украински беспилотни летала од авионски тип биле соборени над неколку руски региони во текот на ноќта, од кои 19 над московскиот регион.

Нападот се случи неколку дена пред одбележувањето на 80-годишнината од победата над нацистичка Германија, што Москва традиционално го слави со воена парада на 9 мај.

Според Собјанин, нападот се одвивал во неколку бранови. Првите пет дронови биле пресретнати нешто по 1 часот по полноќ, додека последниот бран, во кој биле соборени уште десет, се случил околу 2:17 часот. Едно беспилотно летало погодило станбена зграда во јужниот дел на градот, оштетувајќи прозорци и дел од објект на приземјето. За среќа, нема информации за сериозно повредени или загинати.

Како мерка на претпазливост, четирите главни аеродроми во Москва – Домодедово, Шереметјево, Внуково и Жуковски – привремено ги прекинаа операциите.

Руското Министерство за надворешни работи го нарече нападот доказ за „терористичко однесување“ од страна на Киев. Во контекст на овие тензии, Кремљ претходно објави едностран тридневен прекин на огнот во пресрет на Денот на победата, но украинската страна го одби, барајќи 30-дневно примирје како минимум.