Мотоциклистите во Гостивар не навикнаа да носат кацига, вчера 14 казнети

Полициски службеници на СВР Тетово вчера (4 октомври)  од 8 до 12 часот спровеле акциска контрола за санкционирање на прекршоците што ги прават мотоциклистите, во која биле откриени и законски санкционирани  вкупно 40 прекршоци (Тетово-26 и Гостивар-14). Најголемиот број од прекршоците се однесувале на некористење на заштитна кацига, односно шлем, дел ги управувале мотоциклите без положен возачки испит и валидна дозвола за тоа или со истечена сообраќајна дозвола.

На сите им се изготвени соодветни поднесоци и тие ќе се соочат со предвидените парични глоби кои се движат од 50 до 250 евра во денарска противвредност, зависно од видот и карактерот на прекршокот, извести полицијата. При контролата, исто така, санкционирани се и 8 други видови сообраќајни прекршоци.

СВР Тетово уште еднаш со апел до мотоциклистите да не седнуваат зад управувачот без возачка дозвола и задолжително да користат заштитна опрема, а посебно кациги. Им се советува, исто така, да не возат пребрзо низ градските улици, пред се, особено во близина на училишта, детски градинки и слично.