Можни се нови мерки, предлог за задолжителен карантин за лица кои доаѓаат од африканските земји

Министерството за здравство информираше дека Комисијата за заразни болести ќе предложи задолжителен домашен карантин од 14 дена за лица кои доаѓаат од сите африкански земји. До овој момент во земјава се уште не е детектирано присуство на јужноафриканскиот сој на вирусот. Според анализите што вчера ги направи МАНУ на брисот од пацинетот кој пред неколку дена се вратил од Занзибар, детектирано е присуство на британскиот сој на вирусот. Во текот на денешниот ден ќе биде извршена анализа на вториот пацинет, кој исто така патувал за Занзибар и е потврден ковид позитивен. Пациентите се хоспитализирани веднаш откако ги пројавиле првите симптоми на вирусот, соопшти МЗ.

Министерството за здравство и Комисијата за заразни болести согласно актуелната епидемиолошка слика и анализите на Институтот за јавно здравје, не ја исклучуваат можноста да се донесат препораки за нови мерки со цел спречување на понатамошно ширење на КОВИД-19 вирусот. МЗ апелира до граѓаните задолжително да ги почитуваат здравствените мерки и протоколи, како носење маска, одржување хигиена на раце и држење дистанца.