Мурињо го избрка играчот кој му ја скрши ногата на Вајналдум на тренинг

Скршеницата на ногата на последното засилување на Рома, Георгини Вајналдум (31), која ја заработи на тренинг во дуел со соиграчот Феликс Охене Афена-Гјан, беше пресудна за 19-годишниот напаѓач од Гана да го напушти римскиот клуб.

Ова го одлучија раководството на клубот и тренерот Жозе Мурињо, оценувајќи дека Афена-Гјан психолошки и карактерно не одговара на она што се бара од првиот тим на Рома.

Мурињо веднаш по инцидентот им порача на клупските челници „Го отпишав овој човек, пуштете го што е можно поскоро“. Така, Афена-Гјан ќе биде продаден на новиот италијански прволигаш Кремонезе, кој ќе плати седум милиони евра.

На искусниот Вајналдум му се заканува пауза до крајот на годината, што значи дека ќе го пропушти и Светското првенство во Катар на кое требаше да оди како репрезентативец на Холандија.

На денешниот првенствен натпревар против Кремонезе кој го доби Рома со 1-0, тешко се повреди и Николо Заниоло, кој според првинчните информации ќе паузира неколку месеци.