Мусолини потпиша за Лацио

Oваа вест немаше да биде толку интересна доколку презимето на играчот не е такво какво што е – Мусолини. А, тоа пак воопшто не е случајно бидејќи 18-годишниот фудбалер е директен потомок на водачот на фашистичка Италија, Бенито Мусолини.

Екипата на Лацио го официјализираше трансферот на младиот италијан, претставувајќи го како голем талент во школата на Лацио. Како што објавуваат медиумите во Италија, тој наскоро ќе се најде и во првиот тим.

Интересно, Романо Флориани Мусолини беше член на пионерската селекција на Ромa од 13-годишна возраст, пред да се приклучи на градскиот ривал Лацио.

„ Мојот син нема да се меша во политика, повеќе сакам да се држам настрана од овие теми. Син ми многу го сака фудбалот и не сака да му се мешаме во животот “, рече Алесандра Мусолини, внука на Бенито, која е основач на десничарска организација во Италија.

Сакале тие или не, овој трансфер ќе се дискутира во тој контекст. Не толку поради талентираниот фудбалер, туку поради Лацио, поточно славната Curva Nord која во Италија се смета за персонификација на десницата. Фашистички поздрави и свастики, па дури и расистички извици не се толку невообичаени помеѓу навивачите на Лацио. Прашање е само кога Романо Мусолини ќе биде вклучен во таа десничарска иконографија.

Правнукот на Бенито Мусилини, веќе популарниот Романо Флориани Мусолини, се подразбира игра десно крило и десен бек.