Музика без граници: Во Гостивар ќе настапат Баклава и Бла Бла Бла

Во четврток (30 ноември) во Гостивар ќе се одржи заеднички концерт на групите Баклава и Бла Бла Бла, насловен како „Музика без граници“. Настанот е во рамки на манифестацијата „Нов културен бран“, поддржан од Министерството за култура на Македонија.

„Се работи за исклучителен и уникатен заеднички проект на познатите македонски музички групи Баклава и Бла Бла Бла. На концертот членовите на двете групи наизменично и заедно ќе изведуваат композиции на Баклава и Бла Бла Бла, на македонски и на албански јазик. Целта е да се промовира идејата за заедништво во македонското општество преку музика, како и промоција на мултикултурата воопшто. Исто така, сакаме да поттикнеме децентрализација на културните настани, а со тоа и збогатување на културната понуда во внатрешноста на Република Македонија“, велат од Баги комуникации, организатори на настанот.

Концертот ќе се одржи во Центарот за култура „Асном“, а влезот ќе биде слободен.