На болницата во Гостивар и требаат повеќе лекари, болничари, медицински сестри…

Гостиварската општа болница се соочува со недостиг на кадар. Во болничките одделенија има значителен број лекари-специјалисти што се пред пензија кои ќе нема кој да ги замени. Установата има потреба од анестезиолози, педијатри, очни лекари, радиодијагностичари, хирурзи…

„Ни фалат кадри во сите одделенија, затоа еден од главните приоритети во иднина ќе биде насочен кон испраќање на млади доктори на специјализација, а исто така и на доедукација на постоечкиот кадар“, изјави д-р Гојарт Сулејмани, кој стапи на функцијата директор на општата болница „Ферид Мурад“ пред околу еден месец.

Нема доволно лекари ниту во Ургентниот центар, кој дневно опслужува од шеесет до сто пациенти. За да се одржат смените, воведени се дежурства и на специјализанти.

„Моментално во Ургентен се вработени четири лекари, но функционирањето се покрива со дежурање на специјализанти. Наша проценка е дека на Ургентен му требаат најмалку уште осум доктори. Инаку може да кажеме дека Гостивар има многу современ и подобар Ургентен центар од многу други градови“, смета директорот.

Освен лекари на болницата има потреба од медицински сестри, болничари, хигиеничари. Поради локалните избори во овој период не се дозволени вработувања, но Сулејмани вели дека во иднина ангажирањето на нов кадар ќе се стави на листата на приоритети за да се обезбеди максимална грижа за пациентите. Најавите на новото раководство се дека ќе се работи и на реновирање на објектот и модернизирање на опремата.