На инфективно во Гостивар има 21 ковид пациент, во модуларната се поставува централен кислород

На инфективното одделение во гостиварската болница „Д-р Ферид Мурад“ моментално се лекуваат 21 заболен од ковид. Од нив, шест се на кислородна поддршка, а состојбата им е релативно добра, информираше раководителот на одделението доктор Ратко Наумоски.

„На инфективното одделение имаме 21 пациент, од кои 6 се на кислородна поддршка, утрово имавме еден прием и еден испис на пациент. Тие што се на кислородна се во релативно добра општа состојба, додека останатите се во добра и деновиве најверојатно ќе ги испишеме. Симптомите на пациентите се како и до сега, покачена температура,  малаксаност, кај некои дијареа, но карактеристично е што сега голем дел се жалат на болки во грбот. Можам да кажам дека периодов има благо намалување на бројот на амбулантски случаи, како ќе биде понатаму ќе видиме. “, вели д-р Наумоски.

Во модуларната болница се работи на инсталирање на централен довод на кислород, поради што од пред два дена пациентите кои лежеле таму се префрлени на инфективно, каде централниот кислороден систем е завршен.

Освен на инфективното, пациенти со ковид во гостиварската болница се лекуваат и на интерното одделение кое има централен кислород.

Според последните податоци од Министерството за здравство, вкупната бројка на хоспитализирани ковид пациенти во Гостивар е 46. Активно заразени со коронавирус на подрачјето се околу 500 лица.