На инфективно во Гостивар има 21 пациент со ковид – неколкумина се на кислородна терапија

Гостивар, по број на активно заразени со коронавирус периодов е меѓу првите три региони во земјава. Поголемиот дел од позитивните поминуваат со благи симптоми и се во домашна изолација. Сепак, оние кои вирусот ги погодил повеќе, завршуваат на инфективното одделение во гостиварската болница, кое се полни со пациенти. Моментално таму се хоспитализирани 21 пациент со ковид. Според информациите од началникот на одделението, д-р Ратко Наумоски еден од пациентите е во потешка состојба со ниска сатурација-ниво на кислород во крвта и најверојатно ќе биде префрлен во Скопје во текот на денот. Три од хоспитализираните лица добиваат кислородна терапија, а останатите имаат средно-тешка или полесна клиничка слика.

„Различни се симптомите кај пациентите, имаат треска, покачена температура, тешкотии во дишењето, кај некои се јавува и дијареа, а може да се забележи дека сите имаат општа малаксаност. Во однос на возраста, таа е различна. Имаме и помлади пациенти со 40-тина години, но повеќето се повозрасни.“ вели д-р Наумоски.

Утрово од одделението, како оздравена била испишана пациентка со два негативни теста на ковид, а еден пациент бил префрлен на лекување во ковид центарот во Козле.

Состојбата со ширењето на коронавирусот на гостиварското подрачје веќе месец дена се оценува како сериозна. Скоро секојдневно има двоцифрени бројки на новозаразени, а голем дел од граѓаните и понатаму не ги почитуваат мерките на заштита.

„Сакам да апелирам граѓаните да бидат посовесни и да ги почитуваат мерките на заштита. Во градот многу луѓе не носат маски, ни одржуваат дистанца. По кафулињата е преполно, а не се внимава на мерките. И тоа е најголемата причина за порастот на заболени. Гостивар на почетокот беше меѓу градовите каде немаше случаи, а сега секој ден по 17,18 и 20 нови случаи. Алармантна е ситуацијата“, нагласи инфектологот Наумоски.

Според последните податоци од Институтот за јавно здравје, Гостивар моментално има 285 активно болни со корона.