На инфективно во Гостивар само 1 пациент со ковид, 6 се лекуваат од други заболувања

После долго време, инфективното одделение во Гостивар почна да третира и пациенти со други заразни болести, освен ковид. Значителниот мирен период на пандемијата создаде услови за хоспитализирање лица со останати инфективни заболувања, иако одделението официјално не е укинато како ковид центар. За состојбата на инфективно претпладнево  не‘ информираше раководителот д-р Ратко Наумоски.

„На инфективното одделение моментално хоспитализирани се 7 пациенти, од кои само една пациентка е позитивна на ковид, останатите се со други инфективни заболувања: бронхопневмонии, гастроентеритис и сл. Позитивната пациентка е со полесна клиничка слика. Амбулантски инцидентно се‘ уште доаѓаат ковид позитивни и тоа главно од помладата возраст, меѓу 35 и 45 години, сите со полесна клиничка слика, без потреба од болничко лекување. Се‘ уште не ни стигнал допис од Министерството дека се укинуваме како ковид одделение, поради што малку сме во недоумица, но се организираме да не се мешаат позитивни и пациенти со други дијагнози, за да не се пренесуваат заболувања. Имаме две простории за амбулантски третман и ги одделуваме. Исто така, секако и хоспитализираните се во посебни соби. Ние и пред пандемијата, не сме мешале пациенти со различен тип на заразно заболување, за да не си шират инфекции“, рече д-р Наумоски.

На граѓаните кои на инфективно доаѓаат со симптоми на ковид најчесто им се прават брзи тестови, а кога има потреба и ПЦР.

Според последните податоци од Институтот за јавно здравје, заклучно со вчера, регионот на Гостивар има 9 активни случаи на ковид.