На инфективно во Гостивар се лекуваат 20 пациенти со ковид, 6 се на кислородна поддршка

Бројката на активно заразени со ковид на гостиварското подрачје изминатиот период бележи опаѓање и моментално изнесува 191. Лекарите оценуваат дека состојбата се држи на стабилно ниво, но граѓаните и натаму треба да ги почитуваат мерките и протоколите за заштита.

На инфективното одделение во општата болница „Д-р Ферид Мурад“ во Гостивар хоспитализирани се 20 пациенти. Повеќе приеми на нови пациенти имало последните два дена.

„Моментално имаме 20 пациенти на инфективното одделение, од кои 6 се на кислородна поддршка, а останатите се во подобрена општа состојба. Изминатиот период е намален бројот на пациенти, имавме по 10-11 пациенти, може да речам само вчера и завчера малку повеќе примивме и сега се 20. Општо земено смирена е состојбата, но до кога ќе се задржи вака и како ќе се одвиваат работите никој не може да каже.“, информираше д-р Ратко Наумоски, раководител на одделението.

Вкупната бројка на ковид дијагностицирани во Македонија од почетокот на епидемијата изнесува 93.160, бројката на оздравени пациенти е 82.520, на починати е 2.873, а бројот на активни случаи изнесува 7.767.