На пазарот во Гостивар волонтери делеа вода и совети за заштита од жештината

Денешниот пазарен ден во Гостивар се одвива во услови на топлотен бран, трговците колку што можат се обидуваат да останат под сенка, а поголемиот дел од граѓаните побрзаа да испазаруваат порано наутро. Изминатиот период Црвениот крст на Гостивар неколкупати на различни локации делеше вода и совети за заштита од ризично високите температури, а денес младите волонтери од организацијата со иста цел беа токму на градскиот пазар.

На трговци и купувачи им поделија шишиња со вода и ги потсетија како да ги избегнат опасностите од топлотниот бран.

„Продолжуваме со активностите за грижа за здравјето на нашите сограѓани и во наредните денови, за времетраење на топлотниот бран. Препорачуваме почитување и примена на препораките за заштита за време на најтоплиот период од денот (од 10ч до 17ч): избегнувајте напорни физички активности на сонце, постојано внесувајте течности, избегнувајте мрсна калорична храна, носете светла лесна облека и заштитни очила и капа“, нагласуваат од гостиварскиот Црвен крст.

Топлотниот бран ќе трае до петок. За цела Македонија е прогласено портокалово ниво на опасност од високите температури кои го надминуваат 40-тиот степен.