На Питијада 2018 во Ростуше се гостеа голем број посетители, па и Амбасадори

Изборот на најдобра Мавровско-Реканска пита и оваа година собра голем број посетители, кои уживаа во природните убавини на регионот и во вкусните домашни специјалитети.

Пити по традиционални рецепти подготвија седумдесетина домаќинки од сите населени места на општина Маврово Ростуше, од кои 30 влегоа во потесниот круг за избор на најдобра пита. Првото место, според оценката на жирито и припадна на Ќамка Ајдини од село Велебрдо за „Пита со свекло“, која за својот труд и умешност доби пригодна награда.

„Ќе продолжиме да организираме вакви манифестации со цел да се промовираат вредностите и природата на нашиот крај“, рече на отворањето на настанот, градоначалникот Медат Куртовски.

Покрај бројните гости и туристи на Питијадата присуствуваа и Амбасадорките на Јапонија во Македонија, Кеико Ханеда и на Швајцарија Сибил Сутер Тејада.  Настанот беше збогатен и со културно-уметнички изведби со зурли и тапани на “Мајовци“ од Дебар.