На првиот училишен ден Шабани во посета на ОУ „Исмаил Ќемали“ во Гостивар

Заменик министерот за образование Арафат Шабани на првиот училишен ден беше во посета на гостиварското основно училиште „Исмаил Ќемали“. Од таму им посака среќа на учениците во новата учебна година и порача дека за безбедно и успешно спроведување на образованиот процес неопходно е да се почитуваат протоколите пропишани за работа на училиштата во пандемиски услови.

„Честитки до сите наставници, родители, ученици за почетокот на новата учебна година, а и до сите нас што после година и пол децата се враќаат во училишните клупи со настава со физичко присуство. Апелирам до сите да се придржуваат до протоколите за да имаме успешно реализирање на наставниот процес. Знаеме и осетивме како е децата да бидат онлајн, тоа беше една вонредна состојба во којашто немавме друга алтернатива. Сега училиштата се отворени и очекуваме така да продолжат да работат“, изјави Шабани.

Во однос на спроведувањето на протоколите директорката Шпреса Усеини рече дека веќе се навикнати на ваков начин на работа, со оглед дека и лани дел од учениците следеа настава со физичко присуство. „Не ни е проблем да се држиме до протоколите, тие не се ништо ново за нас, така работевме и минатата година и немавме никакви пречки. Годинава секако бројот на деца што ќе доаѓаат на училиште ќе биде поголем, но подготвени сме да ја организираме работата како што е пропишано“, рече Усеини.