На траките за фискални сметки има отровна материја

Бисфенол А е хемикалија којашто ја содржат многу предмети за секојдневна употреба: цд-а, траките на кои се печатат фискалните сметки, пластични шишиња и други. Научната фела од областа на заштита на животната средина и човековото здравје, веќе години наназад предупредува на штетноста од оваа материја. Докажано е дека доколку бисфенолот навлезе во човековото тело, може да предизвика проблеми со плодноста, алергија, тахикардија, иритација на респираторните органи, да го поремети ендокриниот систем… Анализите покажале дека концентрацијата на бисфенол во фискалните се движела од 0,62 до 0,91 %, што е до 40 пати повеќе од дозволеното 0,02 %.

Бисфенолот А прв пат бил развиен во 1930 година, кога научниците се обидувале да синтетизираат материја што ќе го има ефектот на женскиот хормон-естроген. Набрзо се покажало дека добиената хемикалија не е прикладна за медицинска употреба, по што нашла примена во хемиската индустрија-за правење пластични производи. На бизнисот му се допаднале перформансите: висока издржливост, слаба запаливост, можноста да се користи како изолатор. Сепак, со тек на време хормонското делување на бисфенолот почнало да станува проблем. Имено, честичките бисфенол од плстичните шишиња и конзерви, преку храната и пијалокот може да се внесат во човечкото тело.

Во 2011-та година, Европската унија најпрво ги забрани бебешките шишиња кои содржат бисфенол А. Од јануари годинава, употребата на хемикалијата во ЕУ е строго ограничена за термалните траки (за фискални сметки). Прва земја што го забрани бисфенолот во производство на траки беше Швајцарија, и тоа во април, минатата година.

Како заштита се препорачува фискалните сметки да не се ставаат во кесите каде има свежа храна, веднаш по контакт со фискални да се измијат рацете, децата да не доаѓаат во контакт со фискални сметки. Оние кои на работното место секојдневно се во контакт со фискални сметки треба да носат ракавици.