Над 160 физички напади и триесетина тепачки регистрирани лани во Гостивар

Изминатата 2018 година, на поширокото гостиварско подрачје, полицијата регистрирала 298 нарушувања на јавниот ред и мир. Најголемиот број од нив биле целосно расчистени и заокружени со 270 барања за поведување на прекршочна постапка, согласно Законот за прекршоци против јавниот ред и мир. Евиденцијата на СВР Тетово покажува дека најбројни меѓу минатогодишните прекршоци биле физичките напади, кои ги имало 165, потоа тепачките, вкупно 31, по што следуваат карање, викање и непристојно однесување.

Во овие нарушувања биле инволвирани 387,  најмногу машки лица, претежно на возраст од 25 до 45 години.

„Минатата година регистрирани се и 20 омаловажувања и навредувања на овластени службени лица, четири лажни претставувања, три прекршоци уживање наркотични дроги, 4-непостапување по наредба на овластено службено лице, 7-неовластено пукање од огнено оружје или пиротехнички средства и така натаму. Најчесто место на случување на прекршоците се улиците и угостителските објекти, но и друг јавен простор.“, информира Секторот за внатрешни работи.