Над 1,7 милиони претплатници користат интернет преку мобилен, 544 илјади со широкопојасен пристап

Вкупниот број на активни претплатници во мобилната телефонија во земјава достигна 2.095.819 заклучно со третиот квартал од 2024 година, што претставува раст од 9,7% во однос на претходниот квартал и зголемување од 1,05% во споредба со истиот период претходната година – покажува Извештајот на АЕК за развојот на пазарот на електронски комуникации.

Пристап до интернет преку мобилни мрежи (2G/3G/4G) имаат 1.732.063 претплатници, а пристап до интернет со широк опсег 544.937. Забележан е квартален раст од 11,75% кај мобилниот интернет, додека годишниот раст е 2,3%.

Резиденцијалните постпејд претплатници бележат раст од 0,62% квартално и 3,04% на годишно ниво, додека кај деловните постпејд корисници растот е идентичен и изнесува 0,69%.

Се бележи значително намалување на бројот на испратени СМС пораки – за 24,19% во споредба со вториот квартал. Од друга страна, испратените ММС пораки бележат пораст од 6,41% квартално и 17,65% годишно.

Говорниот сообраќај забележува пад – вкупниот број на реализирани повици е намален за 9,79% во однос на претходниот квартал и за 6,95% на годишно ниво. Вкупниот сообраќај во минути е намален за 21,32% квартално и за 17,03% во споредба со истиот квартал од 2023 година. Просечниот појдовен сообраќај по претплатник месечно изнесува 174,67 минути.

Најголем пазарен удел меѓу мобилните оператори има А1 Македонија со 47,71%, следен од Македонски Телеком со 46,66%, Лајкамобајл (3,12%), МТЕЛ (1,21%), Телекабел (1,20%) и Греен Мобиле (0,10%).

Бројот на фиксни телефонски линии во истиот период изнесува 454.160, што е раст од 1,9% на годишно ниво, но сообраќајот преку фиксна телефонија опаѓа – за 21,15% споредено со третиот квартал од 2023 година и за 7,03% во однос на вториот квартал 2024. Корисниците иницирале во просек 5,13 повици месечно.

На пазарот на ТВ-услуги во третиот квартал од 2024 година се регистрирани 437.684 претплатници.