Над 20 казни за брзо возење на гостиварско подрачје во вчерашната акција

Секторот за внатрешни работи Тетово продолжи со акциски контроли за брзина со која се движат возилата на патиштата и по градските улици во Тетово и Гостивар. Вчера (9 април) од 14 до 20 часот спроведена е уште една контрола, во која биле откриени и санкционирани 57 возачи (ТЕ-35 и ГВ-22) кои ја пречекориле дозволената брзина надвор од населено место, од кои двајца за над 70 километри на час, осум возачи кои пречекориле до 70 километри на час и така натаму. Покрај ова, санкционирани биле и 30 возачи во Тетово кои ја пречекориле пропишаната брзина во населено место.

На сите прекршители изготвени им се предвидените поднесоци и тие ќе се соочат со парични глоби, а некои од нив и со времено одземање на возачките дозволи од три месеци до една година, извести полицијата.

Секторот за внатрешни работи Тетово повторно апелира до возачите да ја прилагодат брзината според условите на патот и целосно да ги почитуваат постојните сообраќајни знаци, правила и прописи кои се однесуваат на ограничувања на брзината, посебно на автопатот Гостивар-Тетово-Скопје. Зашто, неприлагодената брзина и годинава е причина број еден за најголемиот број од сообраќајните несреќи, пред се на тетовскиот дел од автопатот и на неколку од пофрекфентните улици во централното подрачје на Тетово.