Над 30 возачи во Гостивар фатени во непрописно престигнување

Во рамките на континуираните активности за поголема безбедност на патиштата во Полошкиот регион вчера (8 септември) во периодот од 10 до 16 часот на гостиварското подрачје спроведена е нова засилена контрола за престигнување, во која се санкционирани 33 прекршоци, соопшти СВР Тетово. Санкционирани, исто така, биле и три други видови сообраќајни прекршоци.

Истиот период на тетовското подрачје спроведена е акциска контрола за брзина, во која биле откриени и санкционирани 37 пречекорувања на максимално дозволената брзина надвор од населено место. Осум од пречекорувањата биле за над 70 километри на час повеќе од дозволеното, 19 за над 50 километри на час повеќе од дозволеното. Покрај ова, констатирани се и 32 пречекорувања во населено место, најмногу за 30 до 50 километри (21) на час повеќе од дозволеното. При контролата, исто така, санкционирани се и пет други видови сообраќајни прекршоци.