Над 500 лица во Гостивар фатени зад волан без возачка дозвола

Полицијата во контролните активности на улиците и патиштата во гостиварско, секојдневно открива возачи без положен возачки испит и валидна дозвола за управување возило.

Во изминатите шест месеци биле фатени 521 лице. „Претежно станува збор за лица кои управувале патнички возила, мотоцикли, а неретко се среќаваат зад волан и на комбиња, камиони, па дури и на автобуси. Најмногу од овие лица се на возраст од 17 до 30 години, од кои не мал број годинава биле и непосредни учесници во сообраќајни несреќи, меѓу кои и со посериозни, смртни последици.“, информира Секторот за внатрешни работи Тетово.

Од СВР нагласуваат дека контролите во чие средиште се возачките дозволи, ќе продолжат да се спроведуваат со зголемен интензитет и динамика.

Управувањето без возачка дозвола е спротивно на Законот за безбедност на сообраќајот на патиштата и за овој вид прекршок предвидена е парична глоба од 300 евра.  Толку изнесува и глобата за лицата кои ќе им ги дадат на користење возилата, иако знаат дека тие не поседуваат возачка дозвола.