Над триесет казни за брзо возење викендов во Гостивар

Сообраќајната полиција во текот на изминатиот викенд спроведе акциски контроли за брзина на поширокото гостиварско подрачје. Исходот ја потврдува несовесноста и недисциплината на возачите.

Вкупно триесет и три возила се движеле пребрзо и тоа 13 низ градските улици, додека останатите по патиштата надвор од населено место. Дваесет и осум возачи се соочиле со казни, додека петмина поминале полесно, со писмени опомени.

„Брзината ќе се контролира и во наредниот период, посебно на градските улици и пред се во вечерните часови, затоа што токму поради нејзиното неприлагодување, многу често се случуваат сообраќајни несреќи со најсериозни последици, односно со загинати или тешко повредени лица и со голема материјална штета“, соопштуваат од Секторот за внатрешни работи.

Казните за брзо возење се движат од 10 до 400 евра, во зависност од тоа колку е пречекорена дозволената граница. За оние кои многу претерале во „фраерлукот“ предвидена е и времена забрана за управување со возилото, од три месеци до една година.