Надлежните повикуваат да се почитува забраната за лов, казните се ригорозни

Од први февруари на ловиштата во поширокиот полошки регион стапи во сила  ловостој, односно воведена е забрана за ловење на заштитениот дивеч. Во таа насока, Секторот за внатрешни работи потсетува дека ловењето во период на ловостој претставува кривично дело „незаконит лов“, за кој е предвидена парична или затворска казна од една до три години, во зависност од тоа каде и што поконкретно е отстрелано.

„Секое  непочитување на ловостојот во овој период ќе биде законски санкционирано, со поднесување адекватни пријави и други мерки. Се укажува, исто така, дека кривично дело е и ловење риби во период на забрана, за кое сторителите ќе се соочат со парична или затворска казна од шест месеци до пет години, во зависност од вкупните околности и причинетата штета.“, нагласуваат од полицијата.

Забраната за лов се однесува на срна, младенчиња – едногодишни и двегодишни од срна, муфлони машки, женски и младенчиња едногодишни и двегодишни од муфлон и дива свиња за кои трае до 30 септември, како и за обичен елен и елен лопатар до 30-ти август односно 15-ти септември.