Надлежните со препораки за патувањето на аџилак – Задолжителна вакцинација и придружба на лекар

Државниот санитарен и здравствен инспекторат излезе со препораки за граѓаните од исламска вероисповед, кои ќе патуваат во Саудиска Арабија на аџилак. Надлежните потсетуваат дека правилата кои треба да се испочитуваат произлегуваат од Законот за заштита на населението од заразните болести, неговите поздаконски акти и согласно меѓународните здравствени правила.

„Лицата кои патуваат на аџилак (масовни собири) во земји ризични на одредени заразни заболувања, можат да патуваат само организирано во групи не помали од 40 лица. Организаторот на патувањето должен е во придружба на секоја група, да обезбеди најмалку по еден лекар со соодветна медицинска опрема и лекови. Десет дена пред почетокот на патувањето да достави список на патници до ДСЗИ со податоци за година на раѓање, место и адреса на живеење, број на патна исправа, број на лична карта и да достави Извештај за патувањето до ДСЗИ со податоци за организаторот, денот на поаѓање и враќање, како и назначени гранични премини и земји низ кои ќе патуваат до Саудиска Арабија. Лицата кои патуваат на аџилак должни се да имаат обезбедено Меѓународно вакцинално уверение (жолта книшка) со доказ за извршена имунизација против менингоков менингит, во надлежен Центар за јавно здравје 10 дена пред заминувањето.“, информира ДЗСИ.

При нивното враќање од аџилак, на самиот граничен премин, лицата ќе бидат задолжени да се јават на здравствен надзор во надлежен Центар за јавно здравје.

Во Република Македонија единствени точки за влез и излез се Меѓународниот аеродром Скопје за патувања на масовни собири по воздушен пат и граничен премин Деве Баир, за патувања по сувоземен пат.