Наградната игра со скенираните фискални ќе има дневни, месечни и главни парични награди

Со секоја скенирана сметка преку апликацијата МојДДВ, граѓаните ќе учествуваат во наградната игра МојДДВ#МојаНаграда. Фондот за наградите е 31 милион денари и сите награди се парични.

Предвидени се награди на дневно ниво, 15 награди на месечно ниво и две главни награди. Според министерката за финансии Нина Ангеловска тоа е унапредување на мерката мој ДДВ која дава резултати и ќе биде дополнителен мотив на граѓаните во борбата против сивата економија.

-Граѓаните ќе добијат парични награди при скенирање на фискалните сметки дополнително од повратот кој е гарантиран и кој изнесува 15 отсто од ДДВ на фискалната сметка. Повратот ќе продолжи, и во декември ќе биде направена првата исплата во износ од три милиони евра назад кон граѓаните, додека со наградната игра овозможуваме дополнително стимулирање и мотивирање на граѓаните да учествуваат во борбата против сивата економија, појасни министерката.

Таа рече дека при креирање на решението се земени предвид и искуствата од 10 земји, а го наведе примерот на Тајван каде во 1951 година адресира сива економија со наградна игра и ја намалува даночната евазија за 75 отсто и до денес ја корисат.

Наградната игра ќе започне кон крајот на ноември, а за деталите граѓаните претходно ќе бидат известени.