Најавена бесплатна замена на печките на дрва со инвертори

Граѓаните кои своите домови ги затоплуваат со печки на дрва, ќе добијат можност истите бесплатно да ги заменат со инвертори. Ова го најави премиерот Зоран Заев, а мерката ќе се реализира во склоп на Планот за намалување на загаденоста на воздухот.

„Од претстојната грејна сезона, најавуваме дека ќе овозможиме бесплатна замена во домаќинствата на печките кои користат огревно дрво и фосилни горива со високоефикасни инвертори. Трошоците за користење на инверторите за домаќинствата се значително пониски од други начини на греење, вклучувајќи го и огревното дрво, топлинскиот комфор е далеку поголем, а како дополнителна вредност е можноста за ладење во летниот период. Но, клучно е дека на овој начин заеднички ќе си го заштитиме воздухот кој сите го дишеме и кој не препознава ни партија, ни политика, ни било каква припадност“, изјави Заев.

Проектот најпрво ќе започне да се спроведува во Скопје, Битола и Тетово, а потоа ќе бидат вклучени и други градови.