Најави за нови фабрики и вработувања – Министерот Бектеши во посета на компании во Гостивар

Министерот за економија Кресник Бектеши заедно со вицепремиерот Артан Груби денес беа во посета на неколку компании во регионот на Гостивар, а посетата ја завршија на локација каде компанијата Алмеро ќе гради нова фабрика.

„Сакам да им честитам на сопствениците на компанијата што имаат храброст во време на пандемија да инвестираат, што кореспондира со мерките што ги реализиравме претходната година и дополнителните што веќе ги најавивме. Тоа е целта, да излеземе во пресрет на вакви инвестици, да ја зголемиме конкурентноста, иновативноста, да креираме нови работни места и да го зголемиме извозот.“, рече Бектеши, најавувајќи дека  следниот месец во Гостивар ќе почнат да се градат уште две фабрики, една за пакувана вода и една за производство за храна.

Министерот рече дека минатата година со мерките на Министерството за економија се поддржани инвестиции на компании од регионот на Гостивар од над 4 милиони евра.

„За поздравување е што има компании кои инвестираат и во време на пандемија. Секако, мерките од Владата да се прошируваат капацитетите и да има нови работни места се од голема помош“, рече Груби.

Бектеши и Груби при посетата беа придружувани од пратеници од ДУИ, заменик министерот за одбрана Башким Хасани, како и потпретседателот на партијата Невзат Бејта.