Најчеста причина за сообраќајки во Гостивар е брзото возење, но возачите не мислат на ризикот

По патиштата, но и низ улиците во населените места низ Гостивар има возачи кои возат како на трка. Пребрзото возење е најчеста причина за сообраќајни несреќи, но поединци немааt совест и дисциплина кога седнуваат зад воланот. Полицијата секојдневно казнува за пречекорување на брзината на возење.

„Сообраќајните контроли  ќе продолжат и во наредниот период, а Секторот за внатрешни работи Тетово уште еднаш апелира до возачите да ги почитуваат сообраќајните правила и прописи кои се однесуваат на брзината и да придонесат за  побезбедни патишта во Полог. Ова, дотолку повеќе што најголемиот број од сообраќајните несреќи и годинава на ова подрачје се причинети од неприлагодена брзина според условите на патот.“, нагласуваат од СВР.

Во последната контрола спроведена вчера  (29 септември) на гостиварско подрачје биле откриени и санкционирани 9  пречекорувања на максимално дозволената брзина надвор од населено место. Покрај ова, санкционирани биле и два други видови прекршоци.

Казните за брзо возење се движат од 10 до 400 евра, зависно од тоа – колку и каде е пречекорена дозволената брзина, но се практикува и времена мерка-одземање на возачката дозвола од три до 12 месеци.