Најплатениот спортист на сите времиња за кој можеби никогаш не сте слушнале

Секој ден сме сведоци на скапи трансфери во спортот, како и на “безобразно“ високи суми кои ги плаќаат компаниите на спортистите за реклами. На пример Тајгер Вудс, најдобро платениот спортист на денешницата, веќе стана милијардер (голф + реклами).

Арно ама, богатсвото на Тајгер Вудс не е ни блиску на она кое за својата 24 годишна кариера го стекнал римскиот тркач со кочии на две тркала – Гај Апулеј Диокле (лат. Gaius Appuleius Diocles), спортист кој заработил толку сестерции (староримски сребрени пари) доволно за да одржува петина од римската војска на највисоко ниво.

Диокле ја започнал неговата кариера на 18 години, а траела неверојатни 24 години. Велиме неверојатни бидејќи ова е опасен спорт и многу учесници гинеле многу млади учествувајќи во трките. Возењето на кочии било нешто слично како денешните трки со автомобили, 7 кругови на патеката, со еден исклучок, сите биле наоружани со мечеви, во случај некој од противниците да им се приближи.

Во текот на својата кариера, Диокле учествувал на 4.257 трки, победил на 1.462, а во 1.483 освоил второ или трето место. Скоро секогаш возел кочија која била влечена со 4 коњи и во оваа категорија бил далеку најдобар.

Откако се повлекол од тркањето на 42 години, Диокле добил свој споменик во Рим кој го подигнале останатите кочијаши заедно со публиката која просто го обожувала, а токму поради сето ова денес знаеме многу поединости за неговиот живот. Многумина пишувале за него и за неговата слава, на наша среќа тие записи се сочувани до денес.

Диокле е роден во Лузитанија во 2-от век, бил неписмен спортист кој до ден денес никој не го надминал по стекнатото богатство занимавајќи се со спорт. Во текот на својата кариера заработил неверојатни 35.863.120 сестерции, доволно да го снабди Рим со годишна залиха од жито, а сето тоа претворено во денешна вредност изнесува околу 15 милијарди долари.