Највисоки цени на гасот во Европа во последните две години

Во Европа, цените на природниот гас забележаа нов рекорден пораст, достигнувајќи 58,750 евра за мегават-час, што претставува највисоко ниво во последните две години. Главни фактори за ова зголемување се ниските температури кои предизвикуваат зголемена побарувачка за енергија, како и намалените резерви во европските складишта, кои во моментот се исполнети со само 49%, значително помалку во споредба со 67% во истиот период минатата година.

Дополнително, слабите ветрови ја намалија продуктивноста на ветерните електрани, што доведе до уште поголем притисок врз резервите на гас. Експертите предупредуваат дека ако оваа состојба продолжи, Европската унија би можела да се соочи со сериозен недостаток на енергија во текот на зимата.

Пазарот дополнително е под влијание на глобалните геополитички случувања, особено можните увозни царини кои ги најави Доналд Трамп, а кои би можеле да ги зголемат трошоците за испорака на течен природен гас од САД во Европа.

Според најновите податоци, цената на мартовските фјучерси на холандското чвориште TTF порасна за повеќе од 5%, што укажува на продолжена нестабилност на енергетскиот пазар. Аналитичарите предвидуваат дека ниските температури и ограничените залихи ќе продолжат да влијаат на цените во наредниот период.