Највкусното мезе: Похувани пиперки со сирење и кромид

Похуваните пиперки со кромид и со сирење, можат да послужат како одлично предјадење и мезе. За да се подготват, потребни се следниве состојки:

6 пиперки

еден кромид

буковец

150 гр сирење, исечено на парчиња, се препорачува да биде што е можно поквалитетно и појако

малку сол

2 јајца

50 грама презла;

масло

Подготовка:

Пиперките треба добро да се испечат, а потоа и убаво да се излупат. Ставете малку сол, бидејќи сирењето е солено. Сирењето треба да се исече на 6 еднакви парчиња и од отворот на пиперката, од каде се вади семето, во секоја пиперка се става по едно парче сирење, ситно сецкан кромид и буковец (не е потребно да се мери, отприлика се става).

Подгответе ја презлата во еден сад и секоја пиперка извалкајте ја во презла. Изматете ги јајцата со многу малку сол, па пиперката извалкајте ја и во изматените јајца. Потоа пржете ги во тава со врело масло.