Најврнежливо во западниот дел на Македонија – метеоропатите на удар

Земјава е зафатена од влажен и студен бран кој донесе нови обилни врнежи од дожд. Според податоците од мерните станици на Управата за хидрометеоролошки работи, најмногу дожд во текот на ноќта и утрово наврнал во западниот дел на Македонија. Во Пожаране измерени се 20 литри на метар квадратен воден талог, во Тетово 19, додека во Маврово 16 литри.

И за во текот на денот се најавува облачно време со врнежи од дожд. Ќе дува засилен ветер од југозападен правец. Во Гостивар и околината претпладнево температурата се движи од 8 до 10 степени. Во ноќните часови на планините можни се врнежи од снег.

Биометеоролошката прогноза неповолна за метеоропатите, особено во попладневните часови. Од УХМР предупредуваат дека очекувани реакции се главоболка, болки во колената, грбот и честа појава на општа слабост. Во вечерните часови поизразени ќе бидат ревматските болки и артритичните промени.