Напад на малолетник кај градскиот стадион во Гостивар

Група насилници се нафрлиле врз четиринаесетгодишно момче и го тепале.  Случајот во полиција го пријавил таткото на нападнатиот малолетник.

Како што е наведено во соопштението од Секторот за внатрешни работи, 44-годишниот татко од гостиварската населба Циглана, ноќеска по полноќ, пријавил дека половина час пред тоа пет непознати лица, физички го нападнале неговиот син. Нападот се случил на пешачкиот мост до градскиот парк во близина на фудбалскиот стадион во Гостивар, каде синот поминувал со уште двајца другари.  Непознатите без повод и причина, го удриле со тупаници по главата и телото и му нанесле видливи повреди, а потоа побегнале од местото.

Се преземаат мерки и активности за идентификување и пронаоѓање на напаѓачите, како и за расветлување на сите поединости поврзани со овој случај, информираат од полицијата.