НАСА за новиот систем во вселената – Има ли таму услови за живот?

Американската вселенска агенција, ги објави долгоочекуваните резултати од последните истражувањата во вселената на меѓународниот тим на астрономи. Системот наречен Трапист-1 го сочинуваат ѕвезда и седум планети со големина на Земјата. Сите планети се наоѓаат во зона кадешто најверојатно владеат умерени температури и има цврсто тло и вода.

Дали тоа значи дека на новооткриените планети има услови за живот?

Научниците, сега за сега, не можат да го дадат одговорот на тоа прашање. Какви се точно условите и што планетите може да понудат, ќе се истражува во наредните години.

Инаку, Трапист-1, ѕвездата со седум планети кои орбитираат околу неа, се наоѓа на далечина од 39 светлосни години (378 трилиони километри) од нас. Една од откриените планети е речиси со иста големина како Земјата и до неа допира речиси идентична количина на светлина.

Во 2018-ма година НАСА ќе го лансира во вселената телескопот James Webb кој ќе даде многу повеќе податоци за новиот планетарен систем.

До новите откритија на научниците, земјаните може се` да и препуштат на својата фантазија.