„Наша Македонија“ манифестација во чест на Илинден во Гостивар

Со интонирање на македонската химна и едноминутно молчење во знак на почит кон загинатите за слобода, вчеравечер во летниот Амфитеатар, крај Вардар во Гостивар започна манифестацијата „Наша Македонија“, во чест на големиот празник 2-ри август, Илинден.

„Оваа прослава е посветена на 116 години од првиот славен Илинден, од којшто се` започна и јубилејот 75 години од Асномскиот Илинден, на кој вековните идеали на многубројните поколенија се остварија. Денес, земјата на многубројните херои кои паднале и ги посеале коските низ цела Македонија им станува полесна, во мир ја гледаат светлината на нашата слобода“, рече Предраг Ристески, дел од организацискиот тим.

Културно-уметничкиот дел од манифестацијата го отвори Градското аматерско културно уметничко друштво „Браќа Ѓиноски“, со настап на оркестарот и фолклорната група со сплет на македонски традиционални народни ора и песни. Пред гостиварци се претстави и културно-уметничкото друштво „7-ми Септември“ од Македонски Брод.

Младата гостиварка Кристина Јовановска настапи во два музички блока, со изведба на македонски народни песни и популарни поп мелодии.