Настан во Гостивар посветен на женското здравје: Жените да најдат време за редовни контроли и прегледи

Жените да посветуваат повеќе време и внимание на своето здравје и редовно да прават превентивни прегледи. Ова беше пораката испратена од вчерашниот настан што се одржа во Гостивар, по повод Меѓународниот ден на акција за женското здравје 28 Мај, воедно и Ден на менструалното здравје.

Припаднички на понежниот пол имаа прилика да слушнат стручни медицински совети и да се консултираат околу своите здравствени проблеми со докторките Маргарита Гавриловска  и Слаѓана Максимоска, а добија и пригодни подароци.

„Самопрегледот, превенцијата и раното детектирање на болестите се многу важни. Во современото живеење жените се под голем притисок, растрчани меѓу семејството и кариерата, секојдневно со безброј обврски, но мора да посветат внимание пред се‘ на своето здравје и редовно да одат на прегледи.“, потенцираа докторките.

Настанот го организираше здружението When in Trouble, со цел да се подигне свеста кај жените за поголема грижа за здравјето и важноста на превенцијата.