Наставата во второто полугодие ќе продолжи на ист начин, за повеќето ученици онлајн

Министерката за образование и наука Мила Царовска денес информираше дека второто полугодие ќе продолжи со хибридниот модел на настава, односно со физичко присуство и онлајн. Во случај на промена на епидемиолошката состојба со коронавирусот, прашањето ќе се разгледува заедно со Комисијата за заразни болести и Министерството за здравство.

Царовска денес одржа онлајн состанок со директорите на основните и средните училишта од целата држава во врска со спроведувањето на наставата во првото полугодие од учебната 2020/2021 година.

МОН соопшти дека на состанокот, директорите на училиштата истакнале дека иако на почетокот на училишната година отпорот кон онлајн наставата бил голем, сепак хибридниот модел ги дал посакуваните резултати во вонредни околности во какви што се работеше изминатите месеци.

„Со над 90 % ученици коишто успешно следеа онлајн настава, со помалку од 1 % активни случаи на Ковид-19 кај наставниците и учениците кои посетуваа настава со физичко присуство и со редовна динамика на емитување на часови на македонски и албански јазик на Националната телевизија слободно можеме да кажеме дека успешно го заокруживме првото полугодие. Наставниот материјал е поминат според предвидените скратени програми, а учениците се оценети“, е изјавата на директорите која ја пренесе МОН.

Министерката потенцираше дека со хибридниот модел на настава: онлајн, со физичко присуство и со емитување на часови на телевизија се постигна континуитет во наставата.

„Огромна благодарност до директорите, наставниците, учениците и родителите коишто со силна посветеност и ангажман направија се успешно да се реализира наставата во услови на пандемија“, рече Царовска.