Наутро прво појадок – па кафе!

Голем дел од луѓето не појадуваат наутро и утринскиот оброк го заменуваат со кафе. Сите знаат дека тоа е лоша навика и голема грешка за здравјето. Зошто?

Оние кои го прескокнуваат појадокот имаат помалку енергија, полошо расположение и послаба концентрација од оние кои појадуваат. Што се однесува до здравствените ризици, истражувањата покажале дека без појадок шансите за дебелење енормно се зголемуваат. Освен тоа постои сериозен ризик од добивање на дијабет тип два.

Сепак не е важно само да појадувате, туку голема улога во здрав почеток на денот игра и што е на менито наутро. На нашето поднебје се практикува пециво, бурек, не ретко и сендвичи. Оваа храна е претешка за организмот во стартот на денот. За појадок не е пожелно да се внесуваат големи количини масти, затоа што така директно делувате негативно врз својот крвоток. Луѓето кои внесуваат маснотии од сабајле имаат послаб проток на крв два часа после оброкот.

Добар избор за појадок е храна што содржи протеини и влакна, како на пример, млеко со ниска масленост и житарки. Влакната ќе го забрзаат вашиот метаболизам, ќе го поттикнат топењето на мастите, а протеините ќе ве држат подолго сити.