Не почитувале првенство на минување, казнети 11 возачи во Гостивар и Тетово

Во рамките на засилените сообраќајно-контролни активности што во континуитет ги презема Секторот за внатрешни работи Тетово вчера (20-ти јуни) од 9 до 14 часот беше реализирана акција за првенство на минување. При контролата биле откриени и санкционирани вкупно 11 прекршоци (Тетово-7 и Гостивар-4). Најголемиот број од нив се однесувале на непропуштање на возило кое се движи по пат што е означен со сообраќаен знак како пат со првенство на минување. На прекршителите изготвени им се поднесоци и зависно од видот на прекршокот тие ќе се соочат со парични глоби од 45 до 300 евра во денарска противвредност. При контролата, исто така, санкционирани се и 19 други видови сообраќајни прекршоци, соопшти полицијата.

Со оглед дека претстои зголемена сообраќајна фреквенција во поширокиот Полошки регион, пред се како резултат на новата летна сезона и скорешното доаѓање на поголем број времено вработени од странство, Секторот за внатрешни работи Тетово со апел до возачите максимално да ги почитуваат сите сообраќајни знаци, правила и прописи и непосредно да придонесат во напорите за поголема безбедност на патиштата и улиците, без загинати и повредени лица.

Ова, дотолку повеќе што во летните месеци значително зголемен е ризикот од несреќи, најчесто како последица од пребрзо возење, непрописно престигнување или техничка неисправност на возилата.