Не пукајте на веселбите, апелира СВР Тетово во пресрет на свадбената сезона

Овој и наредните два месеци, јули и август, на поширокото полошко подрачје закажани се и ќе бидат организирани голем број свадбени и други свечености, најмногу во угостителски објекти на подрачјето.

Со цел навреме да се превенираат и ефикасно да се спречат несакани и незаконски појави,  Секторот за внатрешни работи Тетово презема бројни мерки и активности и апелира до граѓаните да се воздржат од пукање, како и од неовластено организирање огномети, кои во последно време стануваат задолжителна свадбена содржина, односно практика на ова подрачје.

Секторот за внатрешни работи Тетово потсетува дека пукањето и самоволното приредување на огномети е спротивно на Законот за прекршоци против јавниот ред и мир, а паричната глоба за ваквите видови прекршоци, согласно членовите 31 и 32 се движи од 100 до 250 евра во денарска противвредност. Покрај тоа, зависно од последиците, пукањето може да претставува и кривично дело „предизвикување општа опасност“,  за кое согласно член 288 од Кривичниот законик предвидена е и затворска казна од шест месеци до пет години.

На граѓаните, исто така, им се укажува дека свадбените огномети треба задолжително да се пријават во полициските станици или одделенија на подрачјето на кое се организираат, во зависност од нивната категорија, а нивните  организатори навреме да ги спроведат  пропишаните превентивни мерки .

СВР Тетово со апел до граѓаните, исто така, да не палат огнови на отворен простор, да не фрлаат догорчиња и неизгаснати опушоци и да бидат максимално внимателни кога се движат низ полето и шумите, со потсетување дека за предизвикување шумски пожар согласно член 227 од Кривичниот законик предвидена е затворска казна од 8 до 10 години, зависно од крајните последици.

За овие проблеми и состојби деновиве се одржани близу 20 средби со советодавните групи на граѓани и со раководствата на месните и урбаните заедници на подрачјето, чиј иницијатор е Отсекот за превенција, кои ќе продолжат и во наредниот период, а на кои ќе стане збор и за безбедното учество на земјоделската механизација во сообраќајот.