Не сакаат да се „врзат“ – Значително помалку бракови во Гостивар лани

Според податоците на Државниот завод за статистика, бројот на склучените бракови во земјава лани, во споредба со претходната година, е намален за 3,4 % и изнесува 12 882 склучени бракa.

Најмногу бракови, 1 851 или 14,4 %, се склучени во месец август, а најмалку во месец ноември, 761 брак или 5,9 %.

На територијата на Општина Гостивар лани биле склучени 552 брака, што е деведесетина помалку од претходната година. И во соседните општини има намалување на новоформираните брачни заедници. Минатата година во Општина Врапчиште брак склопиле 198 парови, што е за 45 помалку од претходната, додека во Маврово Ростуше лани имало 55 нови бракови, односно 24 помалку.

На државно ниво минатата година, најголем број бракови 4 263 или 33,1% кај жените и 4 721 брак или 36,6% кај мажите се случиле во старосната група од 25 до 29 години.

Просечната возраст при склучување на прв брак е 27,4 години за невестата и 29,9 години за младоженецот.

Бројот на разводи во 2022 година бележи намалување од 17,9 % во споредба со 2021 година и изнесува 1 613 разведени брака.

Според траење на бракот, најмногу разводи 360 или 22,3 % се случиле од 5 до 9 години по склучување на бракот.