Недостиг на вода: Едни со цревата во бавчите, други немаат за пиење!

Граѓани од повеќе делови на Гостивар деновиве испраќаат реакции до нас, дека на плус 40 степени, чешмите дома им се суви, во подолг период од денот. Ни се обратија граѓани од зградите кај големиот пазар, реонот кај автобуската станица и од погорните населби во градот. Прашуваат зошто во најголемите горештини, немаат вода или кога ја има е со многу мал притисок. „Од утрово капка нема, а денес е недела, сакаме да завршиме повеќе работи дома, вода треба и за готвење, перење, за хигиена, за пиење да не зборуваме. Што се прави, што е проблемот, не знам, ова навистина нема смисла“, реагира гостиварец, кој живее во зградите кај автобуската станица.

Gostivarpress ги исконтактира одговорните во Јавното претпријатие Комуналец. Од таму велат дека недостиг на вода и слаб притисок се јавува поради неконтролираните злоупотреби, односно прекумерното користење на водата од водоводната мрежа за наводнување на бавчите и дворовите. „Проблемите се предизвикани од несовесни граѓани кои ја злоупотребуваат водата и ги оставаат цревата за наводнување постојано пуштени. Затоа во текот на денот има недостиг, а ноќта се нормализира. Сите вентили се пуштени, капацитетот е 450 до 500 литри во секунда, но со вакви злоупотреби не може да се избегнат проблемите“, ни рече во телефонски разговор директорот на ЈП Комуналец, Мемедали Џафери.

Најверојатно, најавеното наоблачување и дожд ќе го ублажат проблемот, но се разбира краткорочно. Гостивар во јули и август секоја година бележи рокордна потрошувачка на вода и поради престојот на печалбарите во родниот крај.