Недостигаат судии во Апелациониот суд во Гостивар, особено за кривични предмети

На Апелациониот суд во Гостивар му недостасуваат тројца судии, за да може да функционира нормално. Според систематизацијата предвидени се вкупно 16 судии, заедно со претседателот, но актуелно Апелација има 13. Тие годишно се „борат“ со околу 6.000 предмети.

„Еден судија отиде во пензија, втор даде оставка и трет беше избран за член на Судскиот совет на Република Северна Македонија. Значи, недостасуваат судии. Тоа се одразува во ненавремено завршување на постапките. Реално и просто кажано, во каснење на правдата за граѓаните.“, изјави Шефајет Хајдари, претседател на Апелационен Суд во Гостивар.

Немањето доволен број на судии особено создава проблеми во кривичниот оддел, кадешто предметите треба да ги суди кривичен совет, составен од пет судии. Гостиварска Апелација има само четворица судии кривичари.

„Тројца судии работат кривична материја и јас како претседател и судија, исто така. Но, ние судиме предмети кадешто се потребни пет судии професионалци. И секогаш ангажираме судија од граѓанскиот совет, што реално таквиот судија нормално е оддалечен од кривичната материја и многу малку може да придонесе во текот на разглабањето на самиот предмет. Проблем е, но се снаоѓаме, мора да се снаоѓаме.“, вели Хајдари.

Во годишниот извештај на Апелациониот суд во Гостивар стои дека во 2018-та, судот имал 5.904 предмети, од кои 589 префрлени од претходната година, а останатите  новопримени. Судот решил вкупно 5.390 предемети.

Гостиварска Апелација е надлежна да  решава по жалби против одлуките на Основните судови во Гостивар, Тетово, Дебар и Кичево.