Некој вади трева, некој нема капка вода – Гостиварски Комуналец најавува контроли

Недостигот на вода е проблем кој настанува во делови од Гостивар и повисоките населби, секое лето. Додека некои граѓани со часови ги оставаат цревата со пуштена вода низ дворовите и градините, други дома остануваат со суви чешми.

Од Јавното претпријатие Комуналец нагласуваат дека деновиве поради високите температури потрошувачката на вода е многу зголемена и апелираат на рационално користење.

„Иако, според проценките на надлежните институции има доволна количина на вода за пиење, огромната и неодговорна потрошувачка предизвикува проблеми во снабдувањето со вода во градот. Апелираме до граѓаните за рационална употреба на водата за пиење. Високите температури и употребувањето на водата за наводнување на дворовите, доведуваат до намалување на снабдувањето во најкритичните делови на градот. Ј.П. Комуналец – Гостивар се обврзува во следните денови, во соработка со Општинскиот Инспекторат да ја зголеми контролата за злоупотреба на водата за пиење, по што ќе следат и санкции.“,соопштија од претпријатието.

Комуналец побара од гостиварци да пријавуваат злоупотреба на водата за пиење.