Несекојдневен и интересен настан за децата со посебни потреби во Гостивар

Децата со посебни потреби денес имаа можност да се дружат со службеници од полицијата, пожарникарите и итната медицинска помош и да се повозат низ Гостивар со специјалните возила на овие служби. Овој несекојдневен и интересен настан го организираше Здружението „Заедно можеме“, како проект преку кој треба да се алармираат јавноста и институциите за создавање соодветни услови за лицата со попречености.

„Прошетката на децата со возила со првенство на минување, со вклучен аларм се одвиваше од низ главните градски улици. Целта на проектот е подигнување на свеста на граѓаните и упатување на порака до државните иснтитуции за поголемо залагање и донесување на позитивни закони за создавање на подобри услови за лицата со посебни потреби, со посебен акцент на децата, и нивна социјална инклузија. Идејата, да спроведене токму еден ваков проект ни ја даде наш пријател Агим Мустафаи, по примерот на скандинавските земји“, изјави престедателот на Здружението, Шпенди Салија.

Големо задоволство од активноста изразија и родителите, а дечињата својата благодарност и радост ја искажаа со пораки за љубов и почитување, кои ги делеа на минувачите на плоштадот.

По завршувањето на прошетката со возилата на полицијата, противпожарната единица и итната помош, на децата им беа поделени новогодишни пакетчиња , обезбедени преку донации од повеќе фирми.