Невремето предизвика прекини на струјата во Гостивар

Вчера невечер Гостивар беше погоден од силно невреме, со поројни дождови, грмотевици и ветер, што предизвика прекини на струјата во поголемиот дел на градот. На одредени локации, се уште нема електрична енергија. Од Електродистрибуција информираат дека екипи на терен работат на санација на дефектите.

„Како последица од вчерашното силно невреме, жителите на градското подрачје во Гостивар навечер се соочија со краткотрајни прекини во снабдувањето со електрична енергија. Вчерашните прекини во снабдувањето настанаа поради испад на среднонапонски вод. Екипите на Електродистрибуција веднаш излегоа на терен и го санираа овој среднонапонски дефект, но во меѓувреме се појавија и дефекти на нисконапонска мрежа. Поголемиот дел од дефектите на нисконапонска мрежа се отстранети, а наскоро ќе се заврши со санација и на преостанатите.“, стои во одговорот на Електродистрибуција за Gostivarpress.mk.

Времетраењето на прекините на струјата вчеравечер беше различно во различни делови на Гостивар, од по неколку минути, до неколку часа.