Ниќифорово може да даде уште една потврда дека Македонија е библиска земја

Археолошкиот локалитет „Борче“, кој се наоѓа на километар од Ниќифорово крие древни тајни во насока на уште една потврда за називот на Македонија како „библиска земја“. Мештаните три децении се обидуваат да го свртат вниманието на јавноста кон ова не многу познато и недоистражено верско и културно богатство, за да се приберат податоци, но и соодветно да се заштити и промовира. Локалитетот е прогласен за споменик на културата во 1992-та година. Тука, изминатите триесет години се откриени темели на ранохристијанска базилика, која се смета дека датира меѓу 5 и 6 век, потоа темели на градби и некрополи.

Чекорите се мали, бараат труд, посветеност и време, но се значајни и не треба да запрат. Последниот во тој правец е реализацијата на проектот за конзервација и реставрација на кровот на црквата „Свети Пантелејмон“ што се наоѓа на локалитетот.

Работите почнаа да се изведуваат во август, а се заокружија месецов со запазување на заштитно конзерваторските услови определени од Управата за заштита на културно наследство на барање на Македонската православна црква, Тетовско-гостиварска епархија. Ова православно светилиште е можеби најстариот ранохристијански манастир во Мавровско-реканскиот крај, со голема верска и просветителска улога, особено во времето на Свети Климент Охридски и неговите ученици.

За храмот публицистот Владо Kочоски од Тетово во 2020-та година ја издаде монографијата „Тајната на манастирот Свети Пантелејмон“.

Актуелно покрената е нова иницијатива за изработка на соодветен стручен елаборат за локалитетот, со кој можно е да се потврди дека е дел од сложен манастирски процес. „Иницијативниот одбор на Граѓанското здружение предводено од претседателот професор-доктор Златко Богдановски, инженер Ванчо Алексоски и Тане Арсоски заедно со Јордан Трајков сопственик на винаријата Попова Кула од Демир Капија, со амин на жителите на село Ниќифорово, ја продолжуваат активноста започната во 1989 година, кога при ударничко преуредување на месноста и црквата Св Пантелејмон откриваат некропол и скелет на маж висок околу 160 сантиметри. Чувствата и одговорноста кон сакралното богатство, неимарските изведби на црквите и манастирите од времето на нивното втемелување е уште еднаш повторен спој на љубовта на жителите од овие краишта кон вербата кон Господ низ традицијата како патоказ кон иднината, овојпат како организирана структура во својство со потребите за истражувачко проектирање со Барање за целосна опсервација на објектот и опкружувањето со пошироки дијагностички резултати во името на духовните и архитектокнско – историските потреби.“, подвлекуваат од Еко промотивен центар Г.Г.Доситеј-Маврово.

Посериозни и детални истражувања на „Борче“ и црквата „Св.Пантелејмон“ кај Ниќифорово треба да дадат одговор на важни прашања и поткрепа на сознанијата дека тука се одвивала просветителска дејност и се препишувале црковни книги.

[rev_slider alias=”comparison-slider1-1″][/rev_slider]