Низа хуманитарни настани во чест на д-р Трајче Нешковски, ќе биде откриен и мурал со неговиот лик

Во духот на негување на хуманоста и солидарноста, во Гостивар ќе се одржат тридневни хуманитарни активности во чест на прерано починатиот д-р Трајче Нешковски, кои веќе традиционално ги организира здружението на граѓани што го носи неговото име.

Настаните почнуваат на 18-ти октомври (петок) со хуманитарна музичка вечер во Боа бар. Најавен е настап на Дорис Димовска, Саундчек и Бени и Нон Стоп. Во сабота пак, ќе се спроведе крводарителна акција во Службата за трансфузиологија, како и забавна детска програма на градскиот плоштад. Во недела ќе биде откриен мурал со ликот на д-р Трајче во Малеарди, со музички настап на Мјузик Вива, по што на игралиштето во населбата ќе следува меморијален турнир.

„Ве покануваме да присуствувате на сите настани и со Вашето учество да помогнете во намерите на здружението и оваа година да помогне онаму каде што е најпотребно. И оваа година, како и претходните намерата е да овозможиме за секого по нешто, но и да ја продолжиме хуманата мисија на д-р. Трајче, кој беше и остана синоним за човечност и солидарност. Ако човекот живее онолку колку што се спомнува, тогаш Трајче живее секој ден.“, наведуваат од здружението.

Собраните средства од настаните ќе бидат наменети за: престој во градинка за децата на самохрани родители, потребни помагала за жените борци против ракот на дојка и реновирање на детското игралиште во Малеарди.