Нов проект: Онлајн информирање за административните процедури

Граѓаните на Гостивар и бизнис секторот отсега може да ги добијат сите потребни информации за најразлични административни процедури, преку посебен портал, е-регулација. На порталот се ставени информации за градежни дозволи, добивање разни лиценци, плаќање на даноци, регистрации на фирми и детални податоци од други области.

Општина Гостивар е првата во Македонија што имплементира ваков проект, кој на јавноста и беше презентиран на посебен настан.

„Порталот дава точни информации на граѓаните каде  да се обратат за услугата што им треба, која институција да ја контактираат, кои документи треба да ги поднесат, колку е времетраењето на процедурата, трошоците и се друго. Имаат и можност за секоја некоректност и грешка во описот на процедурите да коментираат онлајн или да дадат сугестија за поедноставување на процедурата“, изјави Лејла Небиу, експерт и координатор на проектот.

Порталот е-регулација моментално функционира на албански и на англиски јазик, а во наредниот период ќе се изврши превод на македонски и на турски јазик. Засега содржината на овие два јазика е достапна само преку неофицијален гугл превод. Линк е поставен на веб страната на општината.

Проектот е поддржан од Швајцарската агенција за развој и соработка, УНДП (Програма за развој на Обединетите нации) и  УНКТАД (Конференција за трговија и развој на Обединетите нации)